रबिन्द्र प्रजापति, फागुन १९ गते रौतहट ।
बाराबाट तीन लाख रुपैयाँ नक्कली नोटसहित धनुषाका एक युवक सशस्त्र प्रहरीको फन्दामा परेका छन् । सशस्त्र प्रहरीले बिहीबार दिउँसो लु ७८ प २३९७ नम्बरको मोटरसाइकलमा बाराको सिम्रौनगढ नगरपालिका वडा नं. ६ अम्मरपुरबाट नहर तर्फ जाने क्रममा नेपाल भारत सीमा क्षेत्रबाट पक्राउ गरेको हो।
पक्राउ पर्नेमा धनुषाको क्षिरेश्वरनाथ नगरपालिका ५ दिगम्बरपुर बस्ने १९ वर्षीय वीरेन्द्रकुमार महतो रहेको प्रहरीले जनाएको छ ।
महतोको साथबाट नेपाली एक हजार दरको ३ सय १ वटा नक्कली नोट र सक्कली १५ सय २५ रुपैयाँ बरामद गरेको सशस्त्र प्रहरी मधेश प्रदेशका प्रमुख डीआइजी गणेश ठाडा मगरले जानकारी दिए।
उनलाई कारबाहीको लागि नेपाल प्रहरीलाई जिम्मा लगाइएको प्रहरीले जनाएको छ।
