चार जना बालकको भारतबाट उद्धार

रौतहट, जेठ ३१ गते ।

रौतहटको एक गैरसरकारी संस्थाले बाल श्रमिकका रूपमा भारत कार्यरत तीन जनालाई उद्धार गरी आफन्तलाई जिम्मा लगाएको छ । यस्तै ताप्लेजुङका अर्का एक बालकको पनि उद्धार भएको छ ।

मुम्बईको एक ब्याग उद्योगमा कार्यरत ३ जना बाल श्रमिकलाई सामुदायिक विकास तथा सचेतना नेपालको पहलमा उद्धार गरिएको हो ।

उद्धार गरिएका नाबालकहरूलाई मङ्गलवार परिवारलाई जिम्मा लगाइएको सामुदायिक विकास तथा सचेतना नेपालका कार्यकारी निर्देशक दिलीप कोइरालाले बताए ।

उद्धार भएका बालकहरूमा राजपुर नगरपालिकाका एक जना, वृन्दावन नगरपालिकाका १ जना र यमुनामाई गाउँपालिकाका १ जना रहेका छन् ।

उक्त संस्थाको पहलमा गत साउन यता २३ जना बालश्रमिकहरुको भारतबाट उद्धार गरिएको कोइरालाले जानकारी दिएका छन् ।यसैबीच ताप्लेजुङ गौरादह नगरपालिका ५ का बुद्धिमान तामाङलाई पनि भारतबाट उद्धार गरी परिवारको जिम्मा लगाइएको छ कामको सिलसिलामा भारत गई हराइरहेकोमा बिहारबाट उद्धार गरेर आफन्तको जिम्मा लगाइएको हो ।