भन्सार छली ल्याइएको ८० हजारको कपडा बरामद, ९५ हजारको भारतीय अखाद्य पेय पदार्थ नष्ट

रौतहट, ८ कात्तिक । रौतहटको मुख्य नाका गौर आसपासका क्षेत्रबाट भन्सार छली गरी भारतबाट नेपाल भित्रर्याउँदै गरिएको कपडाको एउटा पोका सशस्त्र प्रहरीले बरामद गरेको छ ।
प्रहरीले बरामद कपडालाई आवश्यक कारबाहीका लागि गौर भन्सार कार्यालयमा दाखिला गरेको हो ।
सशस्त्र प्रहरी बल नेपाल, गौर गुल्मबाट खटिएको टोलीले भारतबाट टाउकोमा कपडाको पोका बोकेर ल्याउँदै गरेको अवस्थामा उक्त सामान बरामद गरेको बताइएको छ ।
सशस्त्र प्रहरीले कपडाको पोका सहित एक युवतीलाई नियन्त्रणमा लिइएको थियो । उनलाई पहिलो पटक भएकाले चेतावनी दिएर छाडिएको छ । बरामद कपडाको मूल्य करिब ८० हजार रुपैयाँ रहेको छ ।
सशस्त्र प्रहरीका डीएसपी दुर्गाप्रसाद भट्टका अनुसार बरामद कपडा आवश्यक कारबाहीका लागि गौर भन्सार कार्यालयमा बुझाइएको छ ।
यसैबीच, सशस्त्र प्रहरीले करिब ९५ हजार मूल्य बराबरको भारतीय अखाद्य पेय पदार्थ समेत नियन्त्रणमा लिएर नष्ट गरेको छ । उपभोगका लागि अनुपयुक्त ठहरिएका ती पेय पदार्थलाई जमिनमा खन्याएर नष्ट गरिएको डीएसपी भट्टले जानकारी दिए ।
सीमावर्ती क्षेत्रमा हुने भन्सार छली तथा अवैध सामानको ओसारपसार नियन्त्रण गर्न सशस्त्र प्रहरीले निगरानी बढाएको जनाए ।
स्मरणीय रहोसः कपडा बरामद र अखाद्य पेय पदार्थ नष्ट गर्ने घटनाले सीमा क्षेत्रमा अवैध आयात नियन्त्रण तथा उपभोक्ताको स्वास्थ्य सुरक्षासम्बन्धी चुनौतीलाई पुनः उजागर गरेको छ ।