प्रदेश २ : करिब दुई क्विन्टल गाँजासहित दुई जना पक्राउ

रौतहटमा करिब दुई क्विन्टल लागुऔषध गाँजासहित दुई जना पक्राउ परेका छन् । पक्राउ पर्नेमा थाहा नगरपालिका वडा नं. १२ का २५ वर्षीय सुरेन्द्र गोले र १९ वर्षीय रित्तम तामाङ रहेको जिल्ला प्रहरी कार्यालय रौतहटका प्रहरी नायव उपरीक्षक नारायणप्रसाद चिमौरियाले जानकारी दिए ।

दुबैजनालाई प्रहरीले शुक्रबार बिहान पौने १० बजे गौर नगरपालिका वडा नम्बर ४ गढवा टोलबाट गाँजासहित पक्राउ गरेको हो ।
उनीहरूबाट प्रहरीले १८६ किलो गाँजा बरामद गरेको हो । गोप्य सूचनाको आधारमा खटिएको प्रहरी टोलीले उनीहरू चढेको ना ६ ख ५९४३ नम्बरको आइचर ट्रक चेक गरेपछि गाँजा बरामद भएको हो ।

ट्रकमा चेकजाँच गर्दा ट्रकमा फल्स बटम बनाई प्लाष्टिकले बेरेको १२ वटा पोका फेला परेको थियो । त्यसपछि ट्रक चालक गोलेसहित दुई जनालाई प्रहरीले पक्राउ गरेको हो।
यस सम्बन्धमा थप अनुसन्धान भइरहेको प्रहरीले जनाएको छ ।